Syngur Britney Spears í rauðum galla úr gervileðri

Margrét Erla Maack sjónvarpskona er meðlimur Sirkus Íslands og mun leika á als oddi í heilgalla líkt og Britney gerði ódauðlegan í sirkussýningunni Skinnsemi #6 í Iðnó í kvöld.

„Ég hringdi í allar kynlífsbúðir á landinu og kannaði hvort þær ættu Britney-gallann en fékk þau svör að efni hans væri of dýrt til að eiga það á lager,“ segir Margrét Erla Maack sjónvarpskona úr Kastljósi og meðlimur Sirkus Íslands.

Hún hefur látið sérsauma á sig rauðan heilgalla úr gervileðri líkt og Britney Spears klæddist í myndbandinu við lagið Oops, I Did It Again. Búningurinn er fyrir fullorðinssirkussýninguna Skinnsemi #6 sem fram fer í kvöld kl. tíu í Iðnó.

„Okkur fannst fyndið að taka myndbandið og dansa það,“ segir Margrét og á við fyrrnefnt myndband sem verður sett á svið í kvöld. „Þar syng ég með röddinni hennar. Ég hef verið að vinna í henni og er núna að drepast í hálsinum,“ segir hún.

En hver saumaði þennan kynþokkafulla galla á þig? „Stelpa sem ég þekki sem er ein færasta blæði-saumakona landsins en hún er ein af mjög fáum sem kann að vinna með þessi efni,“ segir Margrét.

Sýning kvöldsins er sjötta fullorðinssirkussýning hópsins sem áður hafði getið sér gott orð fyrir fjölskyldusirkus.

Hún segir þau fá frelsi til að gera ögn dónalegri hluti í fullorðinssirkusnum. „Hann er fullorðins með fullorðins húmor. Við sýnum atriði sem okkur hefur alltaf langað að gera en hafa aldrei passað. Þetta fer þó ekki yfir velsæmismörk. Þá kemur enginn,“ segir hún og hlær. „En það er af nógu að taka. Ég er líka í Bollywood-eldatriði og síðan höfum við verið að semja kan-kan dansa.“

En mun rauði heilgallinn rata á skjái landsmanna í Kastljósinu? „Nei, I wish. Ætli hann fái ekki að bíða fram að hrekkjavökunni.“

hallfridur@frettabladid.is