Skokkari réðist á tólf ára dreng

Tólf ára gamall drengur varð fyrir líkamsárás við Arion banka við Breiðumörk í Hveragerði um klukkan hálfátta í gærkvöldi.

Drengurinn hafði ásamt tveimur félögum sínum verð á götunni er þeir sáu til manns á skokki. Piltarnir tóku upp á því að grínast og elta manninn. Skokkarinn brást við með því að stöðvað snarlega og veitast að einum drengjanna með því að slá hann í andlitið, taka hann kverkataki, keyra hann niður í gangstéttina, sleppa taki á drengnum og hélt að því loknu sína leið. Drengurinn hlaut minni háttar áverka en var nokkuð skelkaður eftir meðferðina.

Maðurinn er sagður vera hávaxinn á milli 30 og 40 ára. Hann var klæddur í bláa íþróttapeysu, svartar joggingbuxur með svitaband um enni. Lögreglan svipaðist um eftir manninum en fann ekki. Lögreglan á Selfossi biður alla þá sem veitt geta upplýsingar um atvikið eða þekkja til lýsingar á manninum að hafa samband í síma lögreglunnar 480 1010.