„Björgunarliðið stóð sig frábærlega“

„Auðvitað er ég ánægður því nóttin var ekki sérlega þægileg," segir fimmtugur Þjóðverji sem björgunarsveitir leituðu að á Eyjafjallajökli í alla nótt og fundu undir morgun, hann segir að björgunarlið hafa sýnt mikla fagmennsku í aðgerðum sínum. Hann óttaðist aldrei um líf sitt og stefnir á að fara upp á Vatnajökul við fyrsta tækifæri.

Peter Bullnann er nokkuð vanur fjallagarpur en hann var á leið frá eldstöðinni austur af jöklinum og í Baldvinsskála á Fimmvörðuhálsi þegar hann varð viðskila við tvo félaga sína. Hann segist hafa ætlað niður af jöklinum en vegna veðurs og slæmra skilyrða hafi hann ákveðið að grafa sig í fönn, þar til veðrið gengi niður.

Í gærkvöldi hófu um það bil 150 björgunarsveitarmenn leit að Peter við mjög erfiðar aðstæður. Þyrla var einnig send til leitar, en varð frá að hverfa þar sem skyggni og veður leyfðu ekki leit úr lofti.

Það var svo rétt fyrir klukkan sex í morgun að björgunarmenn á vélsleðum og snjóbíl óku fram á Peter á gangi og hann segir það hafa verið mikinn létti. Hann segist hafa verið mjög vel búinn og hafi í raun aldrei óttast um líf sitt. Og hann ber björgunarmönnum söguna vel

„Það er allt betra en að vera tvær nætur á ísnum. Ég vil þakka öllu björgunarliðinu kærlega fyrir. Það var mjög gott, mjög fagmannlegt. Þeir voru mjög fljótir og stóðu sig frábærlega."

Og Peter lætur þetta ekkert á sig fá og stefnir á Vatnajökul ásamt félögum sínum þegar veðrið batnar. Hann reyndar týndi hluta af búnaði sínum á jöklinum, en vonast til þess að fá hann sem fyrst.

Hér má sjá myndskeið frá björgunarafrekinu sem kvikmyndatökumaður á vegum Sagafilm tók.