Þjónum og bensínafgreiðslumönnum skylt að stöðva drukkið fólk

Upplýsingafulltrúi Umferðarstofu segir þá ábyrgð hvíla á herðum einstaklinga að meta hvort þeir séu hæfir til að setjast undir stýri, en sömuleiðis annarra viðstaddra. Þannig sé þjónum og bensínafgreiðslumönnum skylt að reyna að hindra að drukkið fólk keyri ölvað.

Fyrir helgi var í fréttum Stöðvar 2 sagt frá rúmlega tvítugri stúlku sem játaði nýlega á sig ölvunarakstur við Galtalæk í sumar. Hún var sektuð og missti prófið í hálft ár. Stúlkan er ósátt við niðurstöðuna því hún kveðst hafa fengið að blása í áfengismæli hjá lögreglu í Galtalæk, sem hafi gefið henni grænt ljós á að setjast undir stýri. Tvö vitni staðfesta þennan framburð.

Einar Magnús Magnússon, upplýsingafulltrúi Umferðarstofu, segir einstaklinga bera ábyrgð á að meta eigin ölvun. Raunar nái slík ábyrgð til vitna í ákveðnum starfsstéttum. Í umferðarlögum segir beinlínis að þegar maður hefur neytt áfengis á veitingastað og þjónar hans vita eða hafa ástæðu til að ætla, að hann sé stjórnandi ökutækis beri þeim að reyna að hindra hann í því að aka með því meðal annars að gera lögreglunni viðvart. Sinni þjónn ekki þeirri skyldu er hægt að sekta hann.

Sama gildir um bensínafgreiðslumenn - sem mega aukinheldur ekki að selja ökumanni eldsneyti, ef hann er augljóslega undir áhrifum.

En er þá áfengismælum lögreglu á útihátíðum ekki treystandi? „Ábyrgðin er alltaf ökumannsins og ég held, þó að ég vilji nú ekki tjá mig um þetta tiltekna mál þar sem ég þekki það ekki í þaula, að það sé auðvitað besta reglan að menn standi fullkomlega sjálfir klárir á því hversu vel þeir eru á sig komnir til að fara út að keyra. Það á ekkert að taka neinar áhættur í þeim efnum," segir Einar Magnús.