Vatnsleki á Akureyri og hjá Hjálpræðishernum

Miklar skemmdir urðu í íbúð í fjölbýlishúsi á Akureyri þegar heitavatnskrani gaf sig og heitt vatn flæddi um alla íbúðina í nótt. Íbúarnir voru fjarverandi og þar sem íbúðin er á jarðhæð varð þessa ekki vart fyrr en mikið vatn hafði lekið út.

Slökkviliðið stöðvaði lekann og hreinsaði upp vatnið en ný lagt parket og innrétting á baðherbergi eru ónýt, ásamt ýmsu örðu. Einnig varð vatnstjón í húsi Hjálpræðishersins í Reykjavík þegar vatnsúðakerfi fór í gang í fjórum mannlausum herbergjum og vatn lak niður í samkomusal í kjallara hússins.