Ríkisstjórnin stuðlar að vitundarvakningu vegna mænuskaða

Ríkisstjórnin hefur ákveðið að fela utanríkis-, velferðar- og innanríkisráðherrum að kanna hvernig Ísland getur stuðlað að vitundarvakningu á alþjóðavettvangi vegna mænuskaða. Sameinuðu þjóðirnar munu hefja sérstakt átak til að auka umferðaröryggi í maí næstkomandi.

Átakinu er ætlað að standa í áratug og eru ríki heims hvött til að stuðla að úrbótum í vegamálum, aukinni notkun öryggisbúnaðar, hraðatakmörkunum svo og bættum viðbrögðum við umferðarslysum.

Mænuskaðastofnun Íslands hefur unnið að vitundarvakningu um mænuskaða á alþjóðavettvangi og hafa stjórnvöld aðstoðað samtökin undanfarin ár á ýmsum vettvangi.