Tekinn tvisvar fyrir hraðakstur og keyrði síðan útaf

Karl á fertugsaldri var tekinn fyrir hraðakstur á Miklubraut á laugardagskvöld en bíll hans mældist á 127 km hraða á þeim hluta vegarins þar sem er 80 km hámarkshraði. Í tilkynningu frá lögreglu segir að slíkt sé varla í frásögur færandi nema fyrir þá staðreynd að sami maður var tekinn aftur rúmlega hálftíma síðar á 123 kílómetra hraða. Þá gaf hann þá afsökun að hann væri að flýta sér í bíó, að sögn lögreglu.

„Ætla mætti að einhver hefði nú lært af reynslunni en það virðist þó ekki eiga við um þennan ökumann því bíll hans fannst mannlaus og utan vegar í öðru sveitarfélagi á höfuðborgarsvæðinu nokkrum klukkutímum síðar," segir ennfremur. „Af ummerkjum að dæma er ekki ósennilegt að maðurinn hafi haldið uppteknum hætti og síðan misst stjórn á bílnum með fyrrgreindum afleiðingum. Bíllinn er mikið skemmdur og þurfti að kalla til dráttarbifreið svo koma mætti honum af vettvangi."

Að lokum lætur lögregla þess getið að umræddur ökumaður hafi alloft áður gerst sekur um umferðarlagabrot.