Umboðsmaður skuldara: Vinnubrögð lögmanns „með öllu óásættanleg"

Umboðsmaður skuldara átelur vinnubrögð Guðrúnar Hólmgeirsdóttur, héraðsdómslögmanns, sem sendi bréf til konu í greiðsluaðlögun hjá embættinu þar sem Guðrún sagðist ekki hafa haft tíma til að sinna málum konunnar þar sem hún var upptekin við að horfa á handbolta í sjónvarpinu.

Umboðsmaður skuldara telur þessi vinnubrögð með öllu óásættanleg. Haft hefur verið samband við báða aðila málsins og boðað Guðrúnu á fund hjá embættinu þar sem staða hennar sem umsjónarmanns í málinu verður tekin til skoðunar.

Þetta kemur fram í yfirlýsingu sem umboðsmaður skuldara hefur sent frá sér.

Yfirlýsingin í heild sinni:

„Vegna umfjöllunar í þættinum „Í bítið" á Bylgjunni, fimmtudaginn 27. janúar 2011 vill umboðsmaður skuldara taka fram að hann átelur þau vinnubrögð umsjónarmanns sem lýst voru í þættinum og telur þau með öllu óásættanleg.

Umboðsmaður skuldara hefur haft samband við báða aðila þessa máls og boðað viðkomandi héraðsdómslögmann á fund hjá embættinu þar sem staða hans sem umsjónarmaður í viðkomandi máli verður tekin til skoðunar.

Rétt er að ítreka að ekki er rétt, það sem fram kom í þættinum, að lán með ábyrgðarmönnum eða lánsveð falli ekki undir greiðsluaðlögun."

Upptöku af Bítinu í morgun má hlusta á með því að smella hér, eða á tengilinn hér efst.