Refaveiðar samræmast ekki tilskipunum ESB

Refaveiðar samræmast ekki tilskipunum Evrópusambandsins, sem vill alfarið friða refi. Þá vill sambandið að ríkið tryggi refum friðlönd innan landamæra sinna.

Málið hefur komið til umræðu á svonefndum rýnifundum í tengslum við aðildarumsókn að Evrópusamabndinu. Að sögn Bændablaðsins duga þau litlu frávik sem eru á tilskipunum sambandsins um refi, hvergi nærri til að halda uppi refaveiðum hér á landi, eins og verið hefur.

Þá mun vera ótækt að ríki eða sveitarfélög greiði fyrir refaveiðar eins og nú er gert. Hér á landi er refur friðaður samkvæmt megin reglu laga um veiðar á villtum dýrum, en víðtæk frávik eru frá þeirri grein, hvað refinn varðar.

Nú velta menn því fyrir sér hvort hægt yrði að semja um að þeir, sem verða fyrir tjóni af völdum refs, eins og sauðfjárbændur og æðarbændur megi stunda reafveiðar, en bændur benda á að það se ekkert gagn í að stunda veiðar á eigin jörðum, ef ekki megi veiða hinumegin við lækinn líka, eins og það er orðað.

Í ljósi þessa væru refir væntanlega áköfustu fylgjendur inngöngu í Evrópusambandið, ef þeir fengju eitthvað um það að segja.