Íslendingar hvattir áfram á Evrópuþingi

Íslendingar ættu að halda áfram að veiða hval og stjórna eigin fiskveiðum. Þeir eiga ekkert að gefa eftir í þessum efnum í komandi aðildarviðræðum.

Þetta kom fram í máli nokkurra Evrópuþingmanna á opnum fundi sem utanríkismálanefnd Evrópuþingsins stóð fyrir í Brussel á fimmtudag. Fundurinn fjallaði um aðildarferli Íslands og áskoranir tengdar því. Frá Íslandi ávarpaði fundinn Baldur Þórhallsson prófessor ásamt Nikulási Hannigan úr utanríkisráðuneytinu og Alyson Bailes úr Háskóla Íslands, sem fjallaði um öryggismál.

„Ég bjóst við hvössum spurningum en Evrópuþingmennirnir reyndust bara mjög miklir stuðningsmenn aðildar Íslands,“ segir Baldur.

Breskur þingmaður, Dr. Charles Tannock, gerði hvalveiðar að umræðuefni, segir Baldur, og hvatti Íslendinga ekki bara til að halda þeim áfram heldur til að fá hvalveiðar flokkaðar undir sjávarútvegsmál frekar en umhverfismál, eins og þær eru flokkaðar í dag hjá ESB.

„Svo var þarna portúgölsk þingkona, Comes að nafni, sem vill að Íslendingar fái að ráða sem mestu í sjávarútvegsmálum, enda telur hún að við séum sú þjóð sem best hefur staðið sig í þeim málum. Hún vill að við stöndum föst á okkar og gefum ekkert eftir í viðræðum,“ segir Baldur.

Þingmaður frá Rúmeníu, Cristian Dan Preda, sem situr í sameiginlegri þingmannanefnd Alþingis og Evrópuþingsins, hafi haft áhyggjur af nánu sambandi íslenskra stjórnvalda (forseta Íslands) við Rússland og Kína. Hvort þetta meinta samband myndi fylgja þjóðinni inn í sambandið, þannig að Íslendingar yrðu sérstakir bandamenn Rússa og minntist Dan Preda á norðurheimskautið í því sambandi.

Fundurinn er liður í stefnumótun Evrópuþingsins gagnvart aðildarviðræðum Íslands og ESB, sem eiga að hefjast síðar á árinu.

Fulltrúi framkvæmdastjórnar ESB vegna aðildarviðræðnanna, Alexandra Cas Granje, tók til máls og Baldur segir að hún hafi fengið gagnrýnin tilsvör frá þingmönnum, sem hafi meðal annars sagt henni að ekki væri hægt að ætlast til þess af Íslendingum að þeir tækju upp alla sjávarútvegsstefnu ESB.klemens@frettabladid.is