Fundu kannabis, stera og haglabyssu

Lögreglan á höfuðborgarsvæðinu stöðvaði kannabisræktun í iðnaðarhúsnæði í Kópavogi síðdegis í gær. Við húsleit á áðurnefndum stað fundust 20 kannabisplöntur en ræktunin var vel á veg komin.

Á sama stað var einnig lagt hald á tvö skotvopn, þ.e. haglabyssu og riffil. Karl um þrítugt, sem kom á vettvang á meðan leitinni stóð, var handtekinn en í fórum hans fundust um 25 grömm af kókaíni.

Í framhaldinu var farið til húsleitar hjá leigutaka húsnæðisins, karls á svipuðum aldri. Í híbýlum hans í Grafarvogi fundust á fjórða tug ambúla af sterum og um 20 kannabisplöntur en kannabisræktunin var haganlega falin í bílskúr við heimili mannsins. Málin teljast upplýst.