Tugir björgunarsveitamanna leita gönguhóps

Á bilinu 60 - 70 björgunarsveitamenn leita nú fjögurra manna gönguhóps sem hugðist ganga frá Kleifarvatni og upp á Sveifluháls um klukkan tíu í morgun.

Fólksins er leitað með aðstoð leitarhunda og á fjórhjólum. Þyrla Landhelgisgæslunnar hefur verið ræst út en á erfitt með að athafna sig vegna þoku, samkvæmt upplýsingum frá Slysavarnafélaginu Landsbjörg.

Fólkið gat sjálft látið vita í gegnum farsíma að það væri týnt. Skilaboð um það bárust um eittleytið í dag og voru leitarmenn þá þegar ræstir út.