Kewell tryggði Ástralíu sæti í undanúrslitum Asíubikarsins

Harry Kewell, fyrrum leikmaður Leeds og Liverpool, var hetja Ástrala í átta liða úrslitum Asíubikarsins í gær. Ástralía og Suður-Kórea þurftu bæði framlengingu til þess að slá úr nágrannana í Írak og Íran.

Ástralía vann 1-0 sigur á Írak. Harry Kewell skoraði sigurmarkið með skalla þegar aðeins þrjár mínútur voru eftir af framlengingunni. Kewell fagnaði með því að rífa sig úr treyjunni en þetta var fimmtánda landsliðsmark hans á ferlinum.

Kewell leikur nú með tyrkneska liðinu Galatasaray en hjálpaði þarna ástralska landsliðinu að komast í undanúrslit Asíu bikarsins í fyrsta sinn.

Suður-Kórea vann 1-0 sigur á Íran í hinum leik átta liða úrslitanna í gær. Miðjumaðurinn Yoon Bit-garam skoraði sigurmarkið með vinstri fótar skoti fyrir utan teig á 105. mínútu.

Ástralía mætir Úsbekistan í undanúrslitunum en Suður-Kórea spilar við Japan.