Umferð gengið hægt en áfallalaust

Segja má að snjónum hafi kyngt niður í nótt og voru víða skaflar. Þetta hafði töluverð áhrif á umferð í morgunsárið og máttu margir sætta sig við að mæta of seint í vinnu sökum þess.

Samkvæmt upplýsingum frá umferðardeild lögreglunnar á höfuðborgarsvæðinu hefur umferð gengið hægt en stóráfallalaust enn sem komið er. Mikilvægt er að fólk fari varlega nú sem endranær og hugi að færðinni. „Þeir sem eru illa dekkjaðir ættu bara að vera heima. Ekki að fara af stað og lenda svo í ógöngum," segir Rúnar Sigurpálsson lögreglumaður.

Pjetur Sigurðsson ljósmyndari Fréttablaðsins og Egill Aðalsteinsson kvikmyndatökumaður á fréttastofu Stöðvar 2 og Vísis tóku daginn snemma og mynduðu morgunumferðina.