Eigendur steinbæjar kæra borgaryfirvöld

 „Í mínum huga er þetta ekki steinbær heldur rústir steinbæjar,“ segir Stefán S. Guðjónsson, talsmaður eigenda Klapparstígs 19, sem ekki fá að rífa húsið sem þar stendur til að byggja nýtt.

Fram hefur komið í Fréttablaðinu að byggingarfulltrúi neitaði eigendum Klapparstígs 17 um að rífa gaflinn á brunarústum síns húss þar sem hann styður við 112 ára steinbæ sem stendur á Klapparstíg 19.

Stefán bendir á að aðeins séu tvær hliðar eftir af upprunalega steinbænum. Í afgreiðslu byggingarfulltrúa vegna gaflsins á lóðarmörkunum er hins vegar vísað til þess að það breyti engu, gamli steinbærinn hafi samt varðveislugildi samkvæmt mati Húsafriðunarnefndar og Minjasafns Reykjavíkur.

Magnús Sædal byggingarfulltrúi benti þess utan á í Fréttablaðinu á fimmtudag að steinbærinn væri sá eini sem eftir væri á þessu svæði.

„Með þessu er byggingarfulltrúinn að setja sig upp á móti ákvörðun borgarráðs frá árinu 2004 þar sem allir nema einn greiddu atkvæði með niðurrifi,“ segir Stefán og rifjar upp að eigendur Klapparstígs 19, sem einnig eiga tvo önnur aðliggjandi hús, hafi á sínum tíma fengið heimild til að rífa húsin. „Það er greinilegt að núna vilja einhverjir halda í steinbæinn en það er á skjön við fyrri ákvarðanir. Við þetta erum við mjög ósátt og höfum kært þessa niðurstöðu til úrskurðarnefndar skipulags- og byggingarmála.“

Að sögn Stefáns hafa eigendur Klapparstígs 19 metnað til að reisa íbúðarhús sem falli vel að umhverfinu og sé borginni til prýði. „Við eigendurnir höfum unnið í samræmi við ákvörðun borgarráðs frá 2004 og höfðum, eftir að hafa fengið leiðbeiningar frá skrifstofu skipulagsstjóra, lagt fram deiliskipulagstillögu en henni var hafnað,“ segir hann.

Skipulagsráð sagði ekki hægt að fallast á tillöguna varðandi Klapparstíg 19. „Embætti skipulagsstjóra er falið að vinna að því með lóðarhöfum að gera nýja tillögu þar sem kannað er hvort unnt er að fella steinbæ á lóðinni inn í uppbygginguna,“ sagði í fundargerð ráðsins.

Húsið á Klapparstíg 17 eyðilagðist í eldsvoða fyrir tveimur árum. Stefán segir það mjög miður að borgin skyldi ekki kalla í eigendur Klapparstígs 17 og 19 til sameiginlegs fundar eftir brunann.

„Þarna misstu menn af einstöku tækifæri til að byggja upp hús í sama stíl sem myndu falla vel að sínu umhverfi og mynda heildstæða götumynd,“ segir Stefán S. Guðjónsson. gar@frettabladid.is