Bandarísk fyrirtæki hirða neyðaraðstoð

Óttast er að íbúar Haítí fái í sinn hlut einungis brotabrot af tugmilljarða aðstoð eftir jarðskjálftann þar fyrir rúmu ári. Prófessor gagnrýnir harðlega að bandarísk stórfyrirtæki hirði megnið af aðstoðinni.

Yfir 200 þúsund manns fórust í skjálftanum á Haítí fyrir rúmu ári og vel á aðra milljón manna missti heimili sín - samgöngu- og veitukerfi hafa enn ekki komist í samt lag - og hundruð þúsunda búa enn í tjaldbúðum.

Að frátöldu mannfalli og slysum hefur verið talið að tjónið hafi numið um fjórtán milljörðum bandaríkjadala, eða sem nemur 1.645 milljörðum íslenskra króna.

Alþjóðasamfélagið brást skjótt við, bæði ríkisstjórnir og almenningur, og sendi neyðaraðstoð, við þar á meðal (rústabjörgunin) - en Alex Dupuy, prófessor við Wesleyan háskóla í Bandaríkjunum, skrifar í Washington Post, að Haitibúar séu í vaxandi mæli óánægðir með hversu hægt uppbyggingin gangi eftir skjálftann.

Hann fullyrðir í greininni að af um fimmtán hundruð verkefnum sem boðin hafi verið út í endurbyggingunni, hafi megnið af þeim farið til bandarískra verktaka - verksamingar að upphæð sem nemur yfir þrjátíu milljörðum íslenskra króna - á meðan innlendir verktakar hafi fengið um tuttugu verk, fyrir samtals rúmar fimm hundruð milljónir. Bandarísku fyrirtækin versli við birgja heima fyrir og enda þótt bandarísku fyrirtækin ráði heimamenn í daglaunavinnu; fari megnið af fénu og allur hagnaðurinn aftur til bandaríkjanna.

Þá segir hann enn fremur að innan við tíu prósent af þúsund milljarða króna aðstoð alþjóðasamfélagsins hafi skilað sér; enda þótt gert hafi verið við alþjóðaflugvöllinn og brak eftir skjálftann hreinsað, eigi enn eftir að laga vegi, hafnir, húsnæði og samskiptalínur.