Búið að sótthreinsa Bogann

Búið er að sótthreinsa gervigrasið í íþróttahúsinu Boganum á Akureyri. Eins og Fréttablaðið greindi frá í síðustu viku eru mörg dæmi um að íþróttaiðkendur hafi fengið sýkingar í sár eftir að hafa dottið í grasið þar, vegna þess að það hafði ekki verið þrifið frá opnun. Sýkingavaldar í grasinu eru raktir til þess meðal annars að fólk hræki í grasið.

Sigfús Ólafur Helgason, formaður íþróttafélagsins Þórs og umsjónarmaður í Boganum, segir að öllum síðastliðnum fimmtudegi hafi verið varið í að hreinsa grasið. Því var húsið lokað bæði á fimmtudag og í gær. „Vonandi hefur okkur tekist að hreinsa út óværuna, eins og við köllum hana,“ segir Sigfús.

Hann segir að mikið magn af vatni hafi farið í hreinsunina og þungt loft hafi verið vegna hreinsiefnanna og því hafi verið ákveðið að hafa húsið lokað þessa tvo daga. Opið verður í húsinu í dag samkvæmt áætlun. „Þó að ein knattspyrnuæfing á hausti detti út efast ég um að Íslandsmeistaratitillinn ráðist af því.“- þeb