Magnað myndband af ljósagangi í háloftunum á Reykjanesi

„Það var helvíti magnað að sjá þetta, þetta var mjög flott," segir Einar Sindrason sem var á leið til vinnu klukkan átta í morgun þegar hann sá eitthvað sem líktist loftsteini birtast á himinhvolfinu. Hann var að keyra á Reykjanesbrautinni og ákvað að stoppa til að taka myndband af fyrirbærinu.

„Ég sá þetta bara og ákvað að stoppa, það var miklu flottara að sjá þetta með berum augum en að horfa á þetta í myndbandinu," segir Einar sem er ekki alveg klár á því hvað þetta er. „Þetta kemur samt á svo litlum hraða að þetta getur varla verið loftsteinn en þetta er klárlega eitthvað, því ef þú horfir á allt myndbandið er þetta að birtast aftur og aftur. Þetta eru einhver fjögur stykki sem koma þarna í röð," segir Einar.

Fréttastofa hafði samband við Veðurstofu Íslands en nokkrir einstaklingar höfðu hringt inn í morgun og lýst fyrirbærinu á svipaðan hátt og Einar. Fréttastofa sendi Veðurstofunni myndbandið. „Við erum búin að kíkja á þetta, það sem okkur dettur í hug er þetta hafi verið ískristallar sem hugsanlega hafi átt að verða glitský. Sólin er að koma upp þarna og það er óskaplega kalt í veðri þarna uppi, þá dettur okkur í hug að þetta gæti verið þetta," segir vaktmaður á spádeild en tekur fram að það sé ekki staðfest heldur sé um að ræða tilgátur.

Veðurfræðingur á Veðurstofunni segir að það sé um 40 stiga frost í þessari hæð og allt vatn á svæðinu verða að kristöllum en ekki dropum. „Það glampar miklu meira á þá þegar sólin er svona langt niðri, svo þetta gæti verið endurkast frá ískristöllunum."

Ekki er algengt að ískristallar sjáist hér á höfuðborgarsvæðinu en algengara er að þeir sjáist við viss skilyrði fyrir norðan.