Steingrímur í atvinnuvegaráðuneytið - Samfylkingin fær fjármálaráðuneytið

Gangi áform forystumanna ríkisstjórnarinnar eftir verður Steingrímur J. Sigfússon nýr atvinnuvegaráðherra með verkefni úr þremur ráðuneytum og Samfylkingin fær fjármálaráðuneytið. Umhverfisráðuneytið fær til sín verkefni frá iðnaðarráðuneyti í nýju umhverfis- og auðlindaráðuneyti.

Forsætisráðherra átti síðla dags í gær og í gærkvöldi samtöl við alla þingmenn í þingflokki Samfylkingarinnar þar sem þeim voru kynnt þau áform forystumanna ríkisstjórnarinnar að fækka ráðherrum um tvo. Þingflokkar Vinstri grænna og Samfylkingar munu funda í dag kl. 17:45 þar sem breytingarnar verða formlega afgreiddar.

Þeir ráðherrar sem munu yfirgefa ríkisstjórnina eru Jón Bjarnason og Árni Páll Árnason. Verkefni ráðuneyti þeirra verða færð tímabundið til annarra ráðherra, en samkvæmt heimildum fréttastofu verður efnahags- og viðskiptaráðuneytið ekki lagt niður formlega strax heldur verður skipuð sérstök ráðherranefnd sem mun fjalla um breytingar á stjórnarráðinu.

Til stendur að stofna nýtt atvinnuvegaráðuneyti, en samkvæmt heimildum fréttastofu stendur vilji forystumanna ríkisstjórnarinnar til þess að sameina sjávarútvegs- og landbúnaðarráðuneyti og efnahags- og viðskiptaráðuneyti í nýtt atvinnuvegaráðuneyti og auk þess verða verkefni frá iðnaðarráðuneyti færð til þessa sama ráðuneytis. Ef áform forystumanna ríkisstjórnarinnar ganga eftir verður Steingrímur J. Sigfússon, formaður Vinstri grænna nýr atvinnuvegaráðherra í stóru og öflugu ráðuneyti en búist er við að nokkurra mánaða aðlögunartími sé framundan áður en þessar breytingar verða formlega afgreiddar. Í þessu samhengi hefur verið nefnt að fullbúið muni nýtt atvinnuvegaráðuneyti líta dagsins ljós í apríl næstkomandi. Í millitíðinni verður stofnuð sérstök ráðherranefnd, eins og áður segir, sem mun fjalla um útfærsluna á ráðuneytunum. Fréttastofa hefur þetta eftir heimildum úr þingflokkum beggja stjórnarflokka og ríkisstjórn.

Þá fær umhverfisráðuneytið til sín verkefni frá iðnaðarráðuneyti og verða völd þess ráðuneytis aukin í nýju umhverfis- og auðlindaráðuneyti undir forystu Svandísar Svavarsdóttur.

Fjármálaráðuneytið til Samfylkingarinnar

Við þessar breytingar fær Samfylkingin fjármálaráðuneytið og samkvæmt heimildum fréttastofu hafa tveir ráðherrar verið nefndir í því samhengi. Annars vegar að Guðbjartur Hannesson fari úr velferðarráðuneyti í fjármálaráðuneyti, en hann er fyrrverandi formaður fjárlaganefndar eða að Oddný Harðardóttir, sem einnig er fyrrverandi formaður fjárlaganefndar, verði nýr fjármálaráðherra. Ekki mun fjölga í ríkisstjórn við þessar breytingar því Katrín Júlísdóttir fer í fæðingarorlof á nýju ári og verkefni iðnaðarráðuneytis skiptast milli nýs atvinnuvegaráðuneytis og umhverfis- og auðlindaráðuneytis, eins og áður segir.

Mikil andstaða er við þau áform innan þingflokks Samfylkingarinnar að Vinstri grænir taki við stóru atvinnuvegaráðuneyti en litið er svo á að með því að færa fjármálaráðuneytið til Samfylkingarinnar hafi sáttagrundvelli verið náð meðal þingmanna úr báðum stjórnarflokkunum.

Fjallað verður áfram um málið á hér Vísi og í fréttum Stöðvar 2 í kvöld. thorbjorn@stod2.is