Lauk stúdentsprófinu komin á níræðisaldur

Guðrún Ísleifsdóttir lauk stúdentsprófi frá Menntaskólanum í Hamrahlíð í vikunni, 81 árs að aldri. Leiðir bókmenntaklúbb og stefnir á háskólanám í íslensku og bókmenntum. Segir að samskiptin við samnemendurna hafi gengið vel.

Merkileg tímamót voru hjá Guðrúnu Ísleifsdóttur á miðvikudag þegar hún lauk stúdentsprófi af félagsfræðideild Menntaskólans í Hamrahlíð (MH).

Guðrún er af annarri kynslóð en flestir samnemendur hennar þar sem hún er 81 árs gömul. Hún hyggur á Háskólanám.

„Ég vann mjög lengi í Reykjavíkurapóteki þar sem samstarfsfólk mitt var margt hvert vel menntað. Ég var að vinna með lyfjafræðingum og fleirum sem voru yfir mig settir þannig að ég hugsaði með mér að ég þyrfti nú að fara að læra líka,“ segir Guðrún og hlær.

Í samtali við Fréttablaðið sagðist hún hafa hafið námið þegar hún settist í helgan stein 67 ára gömul.

„Þetta tók nú nokkuð langan tíma hjá mér en ég er búin að vera að dúlla mér við þetta síðan.“

Guðrún fékk fyrir nokkru undanþágu hjá Háskóla Íslands til að hefja nám við guðfræðideild skólans án stúdentsprófs, en þegar hún hugðist skipta um námsbraut var slíkt ekki í boði.

„Mig langaði til að fara í íslensku eða eitthvað í sambandi við bókmenntir, en fékk ekki undanþágu þar, svo það var ekkert annað í málinu en að drífa stúdentsprófið af.“

Guðrún segist því hafa haft samband við MH og fengið góða aðstoð frá námsráðgjöfunum þar við að skipuleggja námslokin.

„Þau voru svo góð að taka við mér,“ segir hún og brosir.

En hvernig var að vera í skóla með krökkum sem geta auðveldlega verið barnabörn hennar?

„Fyrsta daginn horfðu þau svolítið á mig, en svo ekki meir. Það veltur líka svolítið á manni sjálfum hversu maður venst því að umgangast ungt fólk. Við útskriftina reyndi ég líka að vera svolítið ungleg til að það yrði ekki svo áberandi mikill munur, og ég held að það hafi bara tekist vel hjá mér, og ég hafi ekki vakið neina sérstaka athygli,“ segir hún og hlær.

Varðandi hvað taki næst við, sagðist Guðrún altjént ekki á leið í útskrifaferð með samstúdentum sínum.

„Ég vinn mikið með Félagi eldri borgara í Grafarvogi, þar sem ég leiði bókmenntaklúbb. Þar fáum við stundum ungskáld. Svo ætla ég að taka nokkra bókmenntaáfanga í háskólanum og segja það svo gott, nema maður taki einhverja rispu þar, ég veit ekki hvernig það fer.“thorgils@frettabladid.is