Ákvörðun um Vaðlaheiðargöng dregst

Formaður stjórnar Vaðlaheiðarganga óttast að ákvörðun um gangagerðina frestist um einn mánuð enn hið minnsta og segir vont að halda verktökum áfram í óvissu.

Tilboð í verkið voru opnuð þann 11. október í haust og áttu ÍAV og Marti lægsta boð upp á 8,9 milljarða króna, sem var 95% af kostnaðaráætlun.

Málið fór síðan fyrir Alþingi, sem samþykkti þann 17. nóvember að heimila fjármálaráðherra að gera samning um fjármögnun Vaðlaheiðarganga og taka lán fyrir allt að einum milljarði króna fyrir framkvæmdunum. Steingrímur J. Sigfússon fjármálaráðherra lýsti því jafnframt yfir á Alþingi að hann hygðist láta óháðan aðila gera úttekt á sjálfbærni verkefnisins áður en framkvæmdir hæfust.

Steingrímur hafði áður sagt frammi fyrir þingnefnd að hann teldi yfirgnæfandi líkur á að Vaðlaheiðargöng myndi standa undir sér, og gott betur en það, en þá lá fyrir mat MP banka, Arctic Finance og Saga capital á sjálfbærni framkvæmdarinnar. Fjármálaráðuneyti fékk síðan ráðgjafafyrirtækið IFS til að fara yfir útreikningana og forsendur þeirra og hafði verið vonast til að niðurstaða þess fengist um miðjan desember.

Kristín H. Sigurbjörnsdóttir, formaður stjórnar Vaðlaheiðarganga, kveðst hafa fengið þær upplýsingar úr fjármálaráðuneyti að niðurstaða IFS væri ekki komin og kvaðst hún ekki búast við henni fyrr en eftir áramót úr þessu. Niðurstöðuna þyrfti síðan að kynna fjárlaganefnd en þar sem Alþingi kæmi ekki úr jólafríi fyrr en eftir miðjan janúar taldi Kristín blasa við að ákvörðun um Vaðlaheiðargöng yrði vart tekin fyrr en í fyrsta lagi seinni partinn í janúar.

Kristín lýsir vonbrigðum með hversu lengi ákvörðun er að dragast og segir sérstaklega vont að verktökum sé haldið svona í óvissu.

Þá er einnig óvíst hvort umhverfis- og samgöngunefnd muni blandast frekar inn í málið en hún hefur farið þess á leit við forsætisnefnd Alþingis að þingið greiði fyrir úttekt, sem Hagfræðistofnun Háskóla Íslands yrði falið að gera á hagkvæmni Vaðlaheiðarganga.