Á fjórða tug vitna og sakborninga yfirheyrðir

Á fjórða tug vitna og sakborninga hafa verið yfirheyrðir af embætti sérstaks saksóknara vegna meintrar markaðsmisnotkunar Landsbankans fyrir hrun. Sex teymi vinna að yfirheyrslunum en búist er við því að fjöldi sakborninga og vitna aukist.

Embætti sérstaks saksóknara hefur yfirheyrt hátt í 40 manns vegna meintrar markaðsmisnotkunar stjórnenda Landsbankans um fimm ára skeið í aðdraganda hrunsins.

Samkvæmt heimildum fréttastofu munu margir bætast við þann fjölda á næstu dögum og nokkrir hafa nú þegar fengið stöðu sakbornings. Þá mun fjöldi sakborninga breytast á næstunni þar sem sérstakur saksóknari reiknar með því að einhverjir eigi eftir að bætast við en aðrir, sem nú þegar hafa stöðu sakbornings, fá réttarstöðu vitnis. Í samtali við fréttastofu vildi sérstakur saksóknari ekki tjá sig um fjölda sakborninga í málinu en segir sex teymi nú yfirheyra þá sem talið er að komi að málinu.

Fréttastofa Stöðvar 2 sagði frá því í gærkvöld að í gæsluvarðhaldskröfu yfir Sigurjóni Þ. Árnasyni sé hann sakaður um fjársvik, umboðssvik, skilasvik og markaðsmisnotkun sem laut að því að halda uppi gengi hlutabréfa bankans, svo sem með lánveitingum til útvalinna viðskiptavina bankans til kaupa á hlutabréfum bankans með veði í bréfunum sjálfum.

Þá var Halldór J. Kristjánsson, fyrrverandi bankastjóri Landsbankans úrskurðaður í farbann til 25. janúar en Halldór féllst á farbannskröfuna. Að sögn Friðjóns Arnar Friðjónssonar, lögmanns Halldórs, var vilji hans að aðstoða sérstakan saksóknara við rannsóknina og dveljast á Íslandi á meðan hún fer fram. Þess vegna hafi Halldór ekki mótmælt kröfunni um farbann fyrir rétti.