Tölvan var útbúin sem gagnamiðlari

Fartölvan sem fannst í Alþingishúsinu fyrir ári var útbúin sem gagnamiðlari, samkvæmt upplýsingum Fréttablaðsins. Rannsókn lögreglu á henni hefur leitt í ljós að ekkert stýrikerfi var inni á henni, þannig að einungis var hægt að ræsa hana með stýrikerfi sem var utan hennar. Tölvan var forrituð með þeim hætti að hún gat tekið við gögnum og sent þau áfram, án þess að þess sæjust nokkur merki í henni eftir að búið var að slökkva á henni.

Fartölvan var tengd við tölvukerfi Alþingis frá 28. desember 2009 til 2. febrúar 2010, þegar starfs­maður Alþingis fann hana á skrifstofu nefndasviðs Alþingis. Netsnúra sem tengdist borðtölvu í herberginu hafði verið tekin úr sambandi og tengd við fartölvuna. Tölvan var í gangi þegar komið var að henni en búið var að slökkva á henni þegar lögregla fékk hana í hendur til rannsóknar. Hún reyndist vera auðkennalaus þar sem merkingar höfðu verið máðar af henni.

Björgvin Björgvinsson, yfirmaður rannsóknardeildar lögreglunnar á höfuðborgarsvæðinu, tjáði Fréttablaðinu að málið væri enn til rannsóknar og óupplýst.

„Það er ekki tímabært að segja neitt um gang rannsóknarinnar sem slíkrar á þessari stundu," sagði hann í gær.

Enginn hefur réttarstöðu grunaðs manns í málinu, samkvæmt upplýsingum Fréttablaðsins.

Annað tölvumál sem er til rannsóknar hjá lögreglunni á höfuðborgarsvæðinu tengist umfjöllun fjölmiðla um málefni Eiðs Smára Guðjohnsen og Karls Wernerssonar. Þar er ungur piltur, átján ára, grunaður um að hafa stolið tölvugögnum og miðlað þeim áfram til fjölmiðla. Starfsmaður Milestone kærði gagnastuldinn til lögreglu. Pilturinn hafði unnið fyrir Milestone og aðstoðað þar við tölvuvinnslu ýmissa gagna.

Lögregla lagði hald á nokkrar tölvur hjá unga manninum og hefur tekist að rannsaka innihald þeirra að mestu leyti. Samkvæmt upplýsingum Fréttablaðsins hefur rannsóknin skilað nokkrum vísbendingum. Pilturinn sem um ræðir hefur lítillega komið við sögu hjá lögreglu. Hann hefur verið yfirheyrður í þremur málum, þar á meðal þessu. Hann er eini einstaklingurinn sem hefur réttarstöðu grunaðs manns í þessu máli. Hann dvelur erlendis um þessar mundir.

jss@frettabladid.is