Iðnir innbrotsþjófar - „Með því stærra sem við höfum séð"

4. febrúar 2011 12:13

Árni Þór Sigmundsson aðstoðaryfirlögregluþjónn segir að innbrotsþjófarnir þrír sem játað hafa á sig um 70 innbrot á höfuðborgarsvæðinu séu með þeim stórtækari sem lögreglan hefur náð í. Fyrstu brotin voru framin fyrir um tveimur árum síðan. Innbrotum af þessu tagi fækkaði eftir að mennirnir voru settir í gæsluvarðhald. Óhætt er að segja að þetta sé eitt stærsta mál sinnar tegundar hér á landi.

Í byrjun október síðastliðinn fór að bera á aukningu innbrota í heimahús á höfuðborgarsvæðinu. Þau voru framin með svipuðum hætti það er um miðjan dag þegar fólk var að heiman, og virtust þjófarnir helst hafa áhuga á skartgripum, tölvubúnaði, flatskjám og fleira í þeim dúr. Fyrstu innbrotin voru framin í Kópavogi og Breiðholti en færðust svo yfir til Hafnarfjarðar og Garðabæjar.

Grunur beindist að ákveðnum mönnum og voru þeir yfirheyrðir án þess að niðurstaða fengist. Laugardaginn 15. janúar síðastliðinn var einn þessara manna handtekinn vegna gruns um innbrot í heimahús í Mosfellsbæ. Hann var í framhaldinu úrskurðaður í viku gæsluvarðhald. Tveir menn voru handteknir í kjölfarið sem taldir voru meðsekir, og í kjölfarið úrskurðaðir í gæsluvarðhald.

Árni Þór Sigmundsson aðstoðaryfirlögregluþjónn hefur haft veg og vanda að rannsókninni:

„Það liggur fyrir játning á innbrotum í um fimmtíu heimahús og um tuttugu innbrot í gistiheimili og hótel. Það tekur sinn tíma að finna út úr þessu og rannsaka, rannsóknni er viðamikil og hefur staðið yfir frá því þessir menn voru handteknir," segir Árni.

Þremenningarnir, tveir 17 ára piltar og 23 ára karlmaður eru allir útlendingar búsettir hér á landi. Árni vekur athygli á því að lögregla muni setja sig í samband við brotaþola á næstu dögum varðandi bótakröfur, en rannsókn er enn ólokið. En hvað með stærðargráðuna, er þetta með því stærra sem hefur verið upplýst hér á landi?

„Ég held það sé óhætt að fullyrða að svo sé. Þetta er með því stærra en endanleg verðmæti liggja ekki fyrir núna. Það á eftir að skoða það og kortleggja áður en rannsókn lýkur.