RÚV neitar að biðja afkomendur Steinþóru afsökunar

Barnabarn Steinþóru Eyjólfsínu Steinþórsdóttur, skrifar grein í Fréttablaðið í dag þar sem hún gagnrýnir RÚV harðlega fyrir frétt um ömmu sína.

„Af virðingu við ömmu mína sé ég mig knúna til að skrifa þetta og lýsa yfir undrun minni og hneykslan á þessum vinnubrögðum sem ég tel RÚV ekki til framdráttar," skrifar Anný Dóra Hálfdánardóttir en RÚV greindi frá sérkennilegu tryggingasvikamáli sem tengist andláti ömmu hennar, Steinþóru.

Það var árið 2000 sem Steinþóra lést en þá var hún á níræðisaldrinum. Dóttir hennar, sem Vísir ræddi við í síðustu viku, Anný Dóra Halldórsdóttir, sagðist hafa frétt af andláti móður sinnar samdægurs, en Steinþóra bjó í Bandaríkjunum frá sjötta áratug síðustu aldar. Hinsvegar virðist það hafa misfarist að tilkynna íslenskum yfirvöldum um andlát Steinþóru, því tryggingastofnun hélt áfram að greiða út lífeyri í hennar nafni. Alls greiddi stofnunin fjórtán milljónir króna í tíu ár eftir andlát hennar, en stofnunin reiðir sig á dánartilkynningar hjá þjóðskrá.

Í viðtal við Vísi sagði dóttir Steinþóru að fjölskyldan væri afar ósátt við umfjöllun RÚV en í frétt Ríkisjónvarpsins segir að Steinþóra og aðrir úr hennar fjölskyldu séu af mörgum talin vera fyrirmyndir persóna sem fram koma í bókum Einars Kárasonar, Djöflaeyjunni, Gulleyjunni og Fyrirheitna landinu. Steinþóra er þannig talin fyrirmynd Gógóar, sem var mamma Badda í Djöflaeyjunni.

Anný Dóra, barnabarn Steinþóru skrifar svo í grein sína í dag:

„Ég hef farið fram á afsökunarbeiðni frá RÚV en tjáð að slíka fái ég ekki. Að ekki hafi verið nokkurrar vanvirðingar að gæta í fréttunum en harmað ef þetta hafi valdið sárindum. Ég hélt að varlega þyrfti að stíga til jarðar í nafnbirtingum og vanda fréttaflutning á látnum einstaklingum. Ef ég skil þau svör sem ég hef fengið rétt þá var það fréttnæmt og ekki farið rangt með þær staðreyndir að ættingi lægi undir grun jafnframt því sem amma væri þekkt fyrirmynd persónu úr bókmenntum okkar landsmanna. Var þá ekki réttara og fagmannlegra að nafngreina þann grunaða og stikla á lífshlaupi þess aðila?" spyr Anný Dóra.

Hún segir fréttirnar hafa komið fjölskyldunni í opna skjöldu, „Satt best að segja komu þessar fréttir okkur svo í opna skjöldu að ég hefði verið minna hissa ef fullmannað geimfar hefði lent í garðinum mínum. Dæmi nú hver fyrir sig um þennan fréttaflutning RÚV," skrifar Anný Dóra.

Grein Annýar er hægt að lesa í heild sinni með því að smella á hlekkinn fyrir neðan.