Leynifundur í lokuðum þingsal Alþingis

Ein leynilegasta samkunda landsins fór fram fyrir luktum dyrum í Alþingishúsinu í hádeginu í gær. Fundarsal Alþingis var læst og hvorki fjölmiðlar, starfsmenn þingsins né aðrir utanaðkomandi fengu að fylgjast með hvað þar gerðist. Fyrir utan alþingismenn mátti aðeins einn maður taka þátt í fundinum, Ólafur Ásgeirsson þjóðskjalavörður.

Þetta var aðalfundur Hins íslenska þjóðvinafélags, sem haldinn er í Alþingishúsinu á tveggja ára fresti, en Ólafur er forseti Þjóðvinafélagsins. Aðrir stjórnarmenn félagsins fengu ekki að sitja aðalfundinn. Ásta R. Jóhannesdóttir, forseti Alþingis, setti fundinn og stjórnaði honum en Þuríður Backman alþingismaður var fundarritari.

Ástæðu þessarar leyndar telur Ólafur að menn vilji halda í 140 ára hefð sem megi rekja til þess að árið 1871, þegar 17 af 20 kjörnum alþingismönnum stofnuðu félagið, ríkti ekki félagafrelsi á Íslandi. Fundardaginn í gær bar upp á dánardag Jóns Sigurðssonar forseta, en Hið íslenska þjóðvinafélag var stofnað til að styðja Jón Sigurðsson fjárhagslega í sjálfstæðisbaráttunni gegn Dönum, að sögn Ólafs, sem segir að Þjóðvinafélagið hafi verið félag og stjórnmálaflokkur Jóns Sigurðssonar.

Samkvæmt upplýsingum Alþingis gerðist það á aðalfundinum í gær að forseti Þjóðvinafélagsins skýrði frá störfum félagsins frá síðasta aðalfundi og gerði grein fyrir reikningum þess fyrir árin 2008-2010. Voru reikningarnir samþykktir. Að lokum fór fram kosning stjórnar félagsins og endurskoðenda þess.

Ólafur Ásgeirsson þjóðskjalavörður var endurkosinn forseti félagsins. Dr. Guðrún Kvaran orðabókarritstjóri var kosin varaforseti og meðstjórnendur þeir Heimir Þorleifsson sagnfræðingur, Gunnar Stefánsson dagskrárfulltrúi og Karl M. Kristjánsson, aðstoðarskrifstofustjóri Alþingis. Endurskoðendur voru kjörnir Friðrik Ólafsson, fyrrverandi skrifstofustjóri Alþingis, og Sigurður Þórðarson, fyrrverandi ríkisendurskoðandi.

Þjóðvinafélagið gefur út ársritin Almanak og Andvara svo sem það hefur gert frá stofnun þess. Eru þau nýkomin út fyrir þetta ár. Sögufélag annast afgreiðslu bókanna. Fyrr á árinu, hinn 17. júní 2011, kom út aukahefti af Andvara í tilefni þess að þá voru liðin 200 ár frá fæðingu Jóns Sigurðssonar.