Lögreglumenn þreyttir á ofríki

„Lögreglumenn eru þreyttir á ofríki því sem þeim er sýnt og skilningsleysi gagnvart neikvæðri launaþróun þeirra.“ Svo segir í ályktun félagsfundar Lögreglufélags Reykjavíkur sem var samþykkt í fyrradag. Lögreglumenn krefjast leiðréttingu launa sinna miðað við launaþróun annarra stétta síðastliðin tíu ár og segjast eiga betra skilið frá ríkinu.

Lögreglumenn hafa verið án kjarasamninga í tæpa 300 daga. Nú í annað sinn hefur kjaramálum lögreglu verið vísað í gerðardóm meðan aðrar stéttir hafa náð fram samningum við viðsemjendur sína.

„Lögreglumenn geta ekki beitt verkfallsvopni í kjarabaráttu sinni líkt og aðrar stéttir hafa beitt með viðunandi árangri,“ benda lögreglumenn á. „Vegna vopnlausrar baráttu okkar virðist ríkið ekki leggja mikla áherslu á að semja við lögreglumenn sem verða nú í annað sinn að lúta dómi gerðardóms í sinni kjarabaráttu.“

Þeir benda enn fremur á að rekstur lögregluembættanna sé að stærstum hluta laun lögreglumanna. Ríkisvaldið setji síendurteknar kvaðir um niðurskurð til reksturs þeirra, sem þýði fækkun lögreglumanna og lækkun launa þeirra sem eftir standa.- jss