Hótel Borg tvöfaldar herbergisfjölda sinn

Eigendur Hótel Borgar óska nú eftir breytingum á deiliskipulagi svo tvöfalda megi fjölda herbergja hótelsins í fimm hæða nýbyggingu austan við húsið. Með breytingunni yrðu herbergin 99. Hundrað herbergi þykir hentug rekstrareining.

„Í dag eru 56 glæsileg hótelherbergi á Borginni en nauðsynlegt er talið að fjölga þeim til að bæta rekstur þessa fornfræga hótels,“ segir í erindi til skipulagsráðs Reykjavíkur þar sem óskað er eftir því að fá að reisa nýtt hús austan við hótelið og bæta við 53 herbergjum.

Samkvæmt umsókninni til skipulagsyfirvalda er ætlunin að byggja fimm hæða hús bak við Hótel Borg. Nýja húsið verður 2.170 fermetrar. Í dag er hótelið 3.085 fermetrar svo það yrði 5.195 fermetrar eftir breytingu. Það er tæpum eitt þúsund fermetrum meira byggingarmagn en heimilt er í gildandi deiliskipulagi sem aðeins gerir ráð fyrir tveggja hæða nýbyggingu á baklóðinni. Því þarf deiliskipulagsbreytingu til að auka leyfilegt byggingarmagn á lóðinni sem er númer ellefu við Pósthússtræti.

Eftir breytinguna yrðu 99 herbergi á Hótel Borg. Um eitt hundrað herbergi þykir hentugur fjöldi fyrir hótelrekstur. Hótel Borg er rekin af Keahótelum ehf. en sjálfar byggingarnar eru í eigu Aðalsteins Karlsson, Lárusar Blöndals og Guðmundar Birgissonar. „Það væri óskandi að við fengjum að byggja það magn herbergja sem þarf til að nýbyggingin sé raunhæf og að skotið verði traustari stoðum undir rekstur hótelsins til framtíðar,“ segir Aðalsteinn.

Í umsókninni til skipulagsráðs bendir Halldór Guðmundsson, arkitekt hjá THG Arkitektum, á að að ímynd Hótels Borgar í miðborginni hafi verið sterk í áranna rás. „Núverandi eigendur hótelsins endurgerðu bygginguna fyrir nokkrum árum og ekkert var sparað til þess að endurvekja þann glæsileika sem hótelið var áður þekkt fyrir,“ segir í umsókninni.

Meðal þeirra atriða sem reikna má með að eigendur húsa í nágrenni við Hótel Borg hafi áhyggjur af er skuggavarp frá nýju byggingunni. Við vinnslu teikninga sinna kveðst Halldór hafa gert breytingar til að sem minnstur skuggi falli á nágrannalóðirnar. Þess má geta að á fyrstu hæð nýja hússins er ætlunin að hafa rými fyrir smáverslanir, þjónustustarfsemi í kjallara og hótelherbergi á annarri hæð og upp úr.

Ákvörðun um framhald málsins var frestað á síðasta fundi skipulagsráðs. gar@frettabladid.is