Fékk innblástur frá Kurt Cobain

Ein forvitnilegasta nýja stjarna ársins 2011 er bandaríska söngkonan Elizabeth Grant, sem kallar sig Lana Del Rey. Sú sló í gegn með laginu Video Games fyrr á þessu ári, en lagið situr enn á vinsældalista Rásar 2.

Lítið er vitað um stúlkuna og snerist fjölmiðlaumfjöllun í fyrstu aðallega um þrýstnar varir söngkonunnar, henni til mikils ama. Nú hefur Lana hins vegar snúið umræðunni að öðru því hún hefur gefið upp að tónlistarmaðurinn sem hafi veitt henni mestan innblástur sé Kurt Cobain.

„Þegar ég var 11 ára sá ég Cobain syngja Heart Shaped Box á MTV sjónvarpsstöðinni, og ég fraus algjörlega. Mér fannst hann vera fallegasta manneskja sem ég hafði nokkru sinni séð, og þótt ég væri svona ung tengdi ég strax við depurð hans,“ sagði söngkonan í útvarpsviðtali.

Hún hlustaði svo ekki á tónlist Nirvana fyrr en hún varð 17 ára, en hún segir að allt til dagsins í dag haldi Cobain áfram að vera henni innblástur í því að vilja ekki gera neinar málamiðlanir í laga- og textasmíð sinni.