Skilar ítarlegri greiningu

Efni doktorsvarnar Bertrands Lauth, sérfræðings í barna- og unglingageðlækningum, sem hann varði í vor, er aðlögun og þýðing á bandarísku greiningarviðtali (K-SADS-PL) vegna lyndisraskana og geðklofa hjá grunnskólabörnum, mat á notagildi og áhrif þess að innleiða tækið yfir legugeðdeild fyrir unglinga, og mat á réttmæti á algengustu greiningum sem komu fram í úrtakinu.

Ekki hafði áður verið til slíkt greiningartæki fyrir börn og unglinga hér á landi og segir Bertrand það góða viðbót við þau greiningartæki sem hingað til hafa verið notuð.

„Það skiptir miklu máli að vanda greiningu þegar kemur að ákvörðun um meðferð hjá börnum og unglingum. Þetta tæki er ekki nóg eitt og sér en það er mikil viðbót," segir Bertrand. „Það nýtist bæði til ýmissa rannsókna og til ítarlegri greiningar á ADHD og ofvirkni, þunglyndi, kvíðaröskunum, áfallastreitu og átröskun hjá börnum og unglingum svo eitthvað sé nefnt."

Greiningartækið er upp á 190 síður með stöðluðum aðferðum til greiningar geðraskana. Greinandinn notar það bæði við að spyrja barnið eða unglinginn og foreldrana. Niðurstöðurnar eru teknar saman og leitast við að leysa vandamálin sem koma fram en iðulega er ósamræmi milli foreldranna og barnsins.

„Eitt af markmiðum rannsóknarinnar var einmitt að skoða þetta ósamræmi og það sem við köllum samkvæmni milli barnanna og foreldranna. Þessar greiningaraðferðir eru áreiðanlegri og hafa hlotið almenna viðurkenningu í dag bæði hjá fagaðilum og hjá rannsakendum á íslandi."

Greiningartækið er upphaflega bandarískt og hefur Bertrand aðlagað það að íslenskum aðstæðum. Það er nú notað af sérfræðingum hjá BUGL og af skólasálfræðingum í nokkrum skólum. Það var upphaflega innleitt árið 2002 svo komin er reynsla á notkun þess og árangur.

„Hluti rannsóknarinnar var einnig að meta notagildi og áhrif þess að innleiða svona tæki. Það kom í ljós að við greindum miklu betur meðal annars þunglyndi og sjálfsvígshugsanir hjá mörgum," segir Bertrand. „Það er mikið öryggi að nota þetta greiningartæki."

Bertrand hefur starfað sem sérfræðingur í barna- og unglingageðlækningum á barna- og unglingageðdeild Landspítala- háskólasjúkrahúss frá árinu 1998. Hann starfaði í París frá 1989-1998 sem sérfræðingur á Fondation Vallée háskólasjúkrahúsi. Bertrand var stundakennari við læknadeild Háskóla Íslands frá 1998 og aðjúnkt frá árinu 2001.

heida@frettabladid.is