Rafrænt eftirlit talið spara 10 til 15 pláss

Gera má ráð fyrir að um tíu til fimmtán fangelsisrými sparist á ári hverju með rýmkun samfélagsþjónustu og upptöku rafræns eftirlits með föngum í afplánun. Þetta segir Páll E. Winkel, forstjóri Fangelsismálastofnunar.

Alþingi samþykkti nýverið frumvarp um slíkt eftirlit og taka lögin gildi um næstu mánaðamót.

„Upptaka rafræns eftirlits er góð og eðlileg framþróun í fullnustukerfinu,“ segir Páll. „Er þar um að ræða mikilvægt úrræði til að losun fanga úr fangelsi verði stigskipt og markviss. Með góðri hegðan getur því fangi hafið afplánun í lokuðu fangelsi, flust í opið fangelsi, þaðan á áfangaheimili Verndar og loks lokið afplánun með rafrænu eftirliti.“ Spurður um hvað fangi þurfi að uppfylla til að afplána undir rafrænu eftirliti segir Páll þau skilyrði vera lögbundin.

„Meðal þeirra atriða sem nefna má til að fangi teljist hæfur til að sæta rafrænu eftirliti, er að hann hafi fastan samastað sem samþykktur er af Fangelsismálastofnun, stundi vinnu, nám, meðferð eða önnur verkefni sem Fangelsismálastofnun samþykkir og eigi ekki ólokið málum hjá lögreglu, ákæruvaldi eða dómstólum.“

Inntur eftir hvaða form verði á eftirlitinu útskýrir Páll að notast verði við farsíma með staðsetningarbúnaði auk þess sem hugbúnaður hringi óreglulega í fangann þar sem staðsetning, og það að fangi sé með símann, verði staðreynd.

„Þá verður vissulega mannlegt óreglubundið eftirlit á heimili og vinnustað fangans. Mikið er í húfi fyrir fangana þar sem brot á reglum varða flutning í lokað fangelsi.“ Kostnaður við rafræna eftirlitið liggur ekki endanlega fyrir en hagkvæmasta útfærsla sem jafnframt uppfyllir öryggiskröfur verður valin, að sögn Páls.

Fangelsismálastofnun fær 26 milljónir króna til að koma þessu verkefni af stað auk þess að rýmka samfélagsþjónustu sem fullnustuúrræði úr sex mánuðum í níu mánuði.

Páll segir vonir standa til þess að fyrsti fanginn geti hafið afplánun með rafrænu eftirliti í kringum 1. desember næstkomandi.

Hann segir einungis fanga sem hafa verið dæmdir í tólf mánaða fangelsisrefsingu eða meira, og hafi í alla staði staðið sig vel og skapað sér traust, geta lokið afplánun með þessum hætti.

jss@frettabladid.is