Kæra útgáfu leyfis frá Orkustofnun

Bæjarstjórn Hveragerðis hefur sent iðnaðarráðuneytinu kæru vegna útgáfu rannsóknarleyfa í Grændal í Ölfusi. Leyfið var gefið út 10. maí og hefur sætt mikilli gagnrýni, þar með talið frá iðnaðarráðherra sem fór fram á munnlegan rökstuðning fyrir veitingunni.

Aldís Hafsteinsdóttir, bæjarstjóri Hveragerðis, segir Hvergerðinga mjög ósátta við að vera ekki umsagnaraðilar að málinu. Hluti rannsóknarsvæðisins sé innan bæjarmarka sveitarfélagsins og því eðlilegt og í samræmi við eðlilega stjórnsýslu að leita umsagnar þess.

„Í öllu þessu ferli er sérkennilegt að Hveragerði sé ekki umsagnaraðili þegar verið er að skipuleggja og gera áætlanir um stórfellda uppbyggingu virkjana í túnfætinum hjá okkur,“ segir Aldís. Þar á hún bæði við rannsóknir í Grændal, Grænsdal eins og heimamenn nefna hann, og virkjanir við Bitru. Aldís segir að virkjanir þar muni eyðileggja Reykjadal sem ferðamannasvæði.

Samkvæmt upplýsingum frá Orkustofnun er Hveragerðisbær ekki aðili að málinu, rannsóknarsvæðið sé innan Ölfuss. Sveitarstjórn Ölfuss gaf rannsóknunum neikvæða umsögn.

Aldís telur að skilyrðislaust eigi að vernda náttúruna í Grændal og Reykjadal og vísar til skýrslu Náttúrufræðistofnunar Íslands, en þar hafi Grændalur verið í hæsta verndunarflokki háhitasvæða og náttúran þar sögð á heimsmælikvarða.

Leyfi var gefið út fyrir rannsóknum bæði í mynni dalsins og botni hans. „Ef borað verður innst í Grænsdal kallar það á veglagningu niður dalinn eða inn hann. Það er alveg sama hvernig maður snýr málinu, með því er búið að eyðileggja svæðið,“ segir Aldís. Engu skipti hvort nýtanleg orka finnist þar eða ekki.

Sunnlensk orka ehf. sækir um leyfi til rannsókna. Hveragerðisbær var á meðal eigenda fyrirtækisins þar til í vetur, en þá sagði bærinn skilið við það. „Við vildum ekki sjá virkjun þarna og hagsmunir Sunnlenskrar orku og Hveragerðis fóru ekki saman.“

Katrín Júlíusdóttir iðnaðarráðherra gagnrýndi útgáfu leyfisins á sínum tíma og í viðtali við Fréttablaðið 4. júní sagði hún alla þurfa að stíga varlega til jarðar á meðan unnið væri að rammaáætlun um verndun og nýtingu náttúrusvæða. „Það er augljóst að það er eitthvað að í lagaumhverfinu ef þeir telja sig knúna til að komast að þessari niðurstöðu,“ sagði ráðherra þá.

kolbeinn@frettabladid.is