Bíða eftir bænapresti

Söfnuðurinn í Menningarsetri múslima á Íslandi bíður eftir Taha Sidique, bænapresti sínum, eða imam, en hann hefur ekki fengið dvalarleyfi þó að umsóknin hafi verið til afgreiðslu í rúma þrjá mánuði.

Söfnuðurinn vonast eftir því að hann komi áður en Ramadan-mánuðurinn rennur sitt skeið á enda hinn 29. ágúst. Þá er haldin svokölluð Eid al-Fitr hátíð, sem er sambærileg jólahátíðinni fyrir kristna.

S.M. Nasir Uz Zaman, talsmaður Menningarsetursins, segir að haft hafi verið samband við Útlendingastofnun í gær og þau svör fengist að umsóknin hafi fengið jákvæða umsögn þar en síðan hafi hún verið send til Vinnumálastofnunar, þar sem hún verði líklega afgreidd í næstu viku.

Hanna Rún Sverrisdóttir, lögfræðingur hjá Útlendingastofnun, segir að stofnunin áskilji sér þrjá mánuði til að afgreiða umsóknir og sé miðað við þann dag þegar öll gögn liggi fyrir.

Um 400 manns eru í söfnuðinum. Einnig er starfrækt hér á landi Félag múslima og eru félagsmenn 410 talsins. Það hefur einnig innan sinna vébanda tvo íslenska bænapresta. Salmann Tamimi, formaður félagsins, segir að minnsta kosti eitt þúsund múslima búa hér á landi.

Föstumánuðurinn Ramadan hófst á mánudag en þá er múslimum fyrir lagt að borða hvorki þurrt né vott frá sólarupprás til sólarlags. S.M. Nasir Uz Zaman segir það ekki erfitt hér fast upp við norðurheimskautið þó að dagurinn sé afar langur.

„Þessa dagana getum við ekkert borðað frá klukkan þrjú um nótt til klukkan hálf ellefu,“ segir hann. „Ég fékk mér því vel að borða eftir næturbænir fyrir klukkan þrjú í nótt,“ bætir hann við. Á næsta ári verður fastan erfiðari hjá múslimum því Ramadan ber þá upp hinn 20. júlí og stendur til 18. ágúst.

Ljósmyndari Fréttablaðsins leit við á Menningarsetrinu þegar nokkrir voru að fá sér í svanginn í fyrradag. Var hann fræddur um grundvallarlíkindi með kristni og íslamstrú, en Menningarsetursmenn vilja styrkja tengsl þar á milli.

jse@frettabladid.is