Ætla að reyna aftur

Leikkonan Michelle Williams og leikstjórinn Spike Jonze hafa verið að stinga saman nefjum aftur, rúmu ári eftir að þau slitu sambandi sínu. Parið tók fyrst saman sumarið 2008 en leiðir þeirra skildu ári síðar.

Sögusagnir herma að Jonze hafi boðið Williams á tónleika fyrr í mánuðinum í von um að endurnýja vinskap þeirra og hafi hún þegið boðið. „Spike veit að það voru mistök að slíta sambandinu við Michelle og vill ólmur fá hana til baka. Þau ætla að láta reyna á þetta en Michelle vill fara varlega í sakirnar því Spike hefur hryggbrotið hana áður,“ var haft eftir innanbúðarmanni.