Aukakostnaður við fangelsi 584 milljónir

Áætlaður aukakostnaður við staðsetningu nýs fangelsis á Hólmsheiði er 26,2 milljónir króna á ári. Sú fjárhæð samsvarar 584 milljónum króna yfir nýtingartíma fangelsisins, fjörutíu ár, núvirt. Sú fjárhæð hækkar eftir því sem staðsetning fangelsisins fjarlægist höfuðborgarsvæðinu.

Deloitte FAS reiknaði út kostnaðarauka tengdan staðsetningu hins nýja fangelsis sem áætlað hefur verið að reisa á Hólmsheiði fyrir innanríkisráðuneytið í október á síðasta ári. Í skýrslu Deloitte kemur fram að áhersla hafi verið lögð á að greina hvaða liðir hefðu kostnaðartengd áhrif í för með sér. Ákveðið var að reikna með kostnaði vegna yfirheyrslna, túlkaþjónustu, flutnings fanga í dómsal og ferðakostnaðar lögfræðinga.

Kostnaðaraukinn er metinn miðað við að fangelsið verði byggt í 55 kílómetra fjarlægð frá höfuðborgarsvæðinu og er þar miðað við Hólmsheiði. Kostnaðurinn eykst eftir því sem fjarlægðin verður meiri frá Reykjavík. Því er talið ólíklegt að nýtt fangelsi muni rísa annars staðar á landinu en á Hólmsheiði, en ekki verður gert ráð fyrir þeirri staðsetningu í útboðsgögnunum.

Samkvæmt upplýsingum frá innanríkisráðuneytinu er ástæða þess að útboðsgögnin liggja ekki fyrir sú að Reykjavíkurborg hefur átt í viðræðum við Mosfellsbæ og eigendur Vilborgarkots á Hólmsheiði varðandi lóðamál.

Ágúst Jónsson, hjá framkvæmdasviði Reykjavíkurborgar, segir að nú hafi komið fram frá Mosfellsbæ að lóðin sé á svæði Reykjavíkur, en jörðin Vilborgarkot liggur að hluta inni á svæði áætlaðs fangelsis.

„Við erum í viðræðum við eigendur lóðarinnar og ég hef ekki ástæðu til að ætla annað en að þetta fari mjög vel,“ segir Ágúst. „Þetta er smá skiki sem við erum að tala um, einungis lítil prósenta af jörðinni, sem Reykjavíkurborg mun líklega kaupa af eigendum.“

Jón G. Briem er einn af tíu skráðum lóðareigendum Vilborgarkots og segir hann að viðræður við Reykjavíkurborg gangi vel. Ekki hefur þó verið gengið frá samningum að fullu.

Stefnt er að því að bjóða verkið út síðar í mánuðinum. Um 35.000 fermetrar fara undir lóðina.sunna@frettabladid.is