Ætla að kæra aðstoð verði hún veitt

Höfðað verður mál á hendur Kópavogsbæ fari svo að bæjarstjórn staðfesti í dag samþykkt bæjarráðs Kópavogs frá því á fimmtudag um að greiða lögmannskostnað vegna meiðyrðamáls á hendur þremur bæjarfulltrúum.

Félagið Frjáls miðlun höfðaði málið gegn Guðríði Arnardóttur og Hafsteini Karlssyni úr Samfylkingunni og Ólafi Þór Gunnarssyni úr Vinstri grænum vegna ummæla þeirra í blaðagrein. Frjáls miðlun er í eigu dóttur og tengdasonar Gunnars I. Birgissonar, fyrrverandi bæjarstjóra Kópavogs, en ummælin vörðuðu viðskipti Frjálsrar miðlunar við Kópavogsbæ.

Jóhann H. Hafstein héraðsdómslögmaður segist fara fyrir hópi einstaklinga í Kópavogi sem sætti sig ekki við að bærinn leggi út fyrir kostnaði bæjarfulltrúanna. Hann segist gera ráð fyrir að fyrsta skrefið yrði að kæra málið til innanríkisráðuneytisins, sem fari með málefni sveitarstjórna. „Í rauninni er það réttur hvers Kópavogsbúa að bera þessa ákvörðun undir réttan aðila," áréttar hann.

Bæjarráð setti sem skilyrði fyrir samþykkt sinni á greiðslu kostnaðarins að bæjarfulltrúarnir undirrituðu samkomulag við bæinn þess efnis að þeir endurgreiði í bæjarsjóð greiðslu vegna málskostnaðar verði niðurstaða Hæstaréttar Íslands sú að þeir hafi brotið gegn ákvæðum hegningarlaga.

Gerð er athugasemd við að ekki liggi fyrir endanlegur kostnaður vegna málarekstursins og að í raun sé íbúum Kópavogs gert að greiða lögmannskostnað fyrir bæjarfulltrúa í einkamáli þeirra. Kópavogsbær eigi enga aðild að málinu.

Átalið er að bæjarráð hafi samþykkt greiðslurnar þrátt fyrir að í fyrirliggjandi áliti Lagastofnunar Háskólans komi fram að greiðsla málskostnaðar fyrir kjörna bæjarfulltrúa búi til örðug álitamál í ljósi jafnræðisreglna og fordæmi sem leitt gæti til þess að játa yrði öðrum en kjörnum fulltrúum sambærilega aðstoð.

Jóhann segir hins vegar upphæðir skipta minna máli í þessu samhengi, fyrir liggi að kostnaðurinn vegna málarekstursins verði ekki slíkur að það íþyngi bænum. „Það er prinsippmál að bæjarfulltrúar geti ekki sjálfir samþykkt til sín greiðslur úr bæjarsjóði," segir hann.

olikr@frettabladid.is