Vatnavinir hljóta alþjóðleg verðlaun í arkitektúr

Vatnavinir hafa hlotið hin virtu alþjóðlegu verðlaun í arkitektúr Global Award for Sustainable Architecture 2011 fyrir verkefnið Heilsulandið Ísland. Locus Foundation standa árlega fyrir þessari verðlaunaveitingu sem er hugsuð sem viðurkenning til handa arkitektum fyrir framþróun á sviði sjálfbærni í arkitektúr. Olga Guðrún Sigfúsdóttir, arkitekt og meðlimur í Vatnavinum, segir hópnum sýndur mikill sómi og heiður með verðlaununum.

„Við erum hæstánægð að hafa hlotið þessi virtu og eftirsóttu verðlaun. Þetta er mikil viðurkenning á þeirri ferðaþjónustu sem við höfum, ásamt fleiri aðilum, sveitafélögum, staðarhöldurum og ferðaþjónum, þróað í átt að sjálfbærni á Vestfjörðum, með því að vekja athygli ferðafólks og heimamanna á náttúrulaugum sem eru þar," segir Olga en hlutverk arkitekta í verkefninu hefur verið að leggja til hugmyndir að frekari uppbyggingu á ferðaþjónustu tengdri laugunum fyrir vestan.

Verðlaunin eru nú veitt í fimmta sinn. Yfir 200 tilnefningar bárust til þeirra í ár og eru Vatnavinir á meðal fimm aðila sem urðu hlutskarpastir að þessu sinni. Olga telur að þátttaka þeirra í samnorrænu sýningunni Manmade Environment í haust, sem helguð var sjálfbærum landslagsarkitektúr, hafi vakið athygli Locus á verkefninu og átt þátt í tryggja þeim verðlaunin. Fulltrúi hópsins flýgur svo utan til Parísar síðla maí til að veita þeim formlega viðtöku í Cité de l"Architecture.

En hvaða þýðingu hafa verðlaun af þessu tagi?

„Fyrir utan að ýta undir sjálfbærni og vera mikil viðurkenning á starfinu, eins og ég segi, þá verða þau vonandi til að vekja frekari athygli stjórnvalda á þessu fjölbreytta verkefni og fá þau þannig til að styðja og hlúa betur að því," segir Olga og getur þess að þegar hafi erlendir fjölmiðlar farið mjög lofsamlegum orðum um verkefnið Vatnavinir Vestfjarða. Það hafi að auki hlotið virtu Eden-ferðamálaverðlaunin í Brussel í fyrra, en þau eru árlega veitt þeim evrópsku áfangastöðum sem þykja nálgast ferðamennsku með nýjum og frumlegum hætti.

„Vonandi verður þetta bara allt saman til þess að við Íslendingar uppgötvum hvar verðmætin liggja, í heita vatninu og einstakri náttúru," segir hún loks.

roald@frettabladid.is