Ekki senda afdankaða þingmenn

Varaforseti Evrópuþingsins, Diana Wallis, segir þingið stöðugt sækja í sig veðrið og fulltrúar þar hafi æ meiri pólitíska vikt. Áður loddi við þingið að þangað settust stjórnmálamenn í helgan stein.

Wallis hélt í liðinni viku fyrirlestur í Háskóla Íslands um áhrif þingmanna smáríkja á Evrópuþinginu. Hún sagði að íslenskir Evrópuþingmenn gætu haft töluverð áhrif á þinginu, enda væru þar ekki greidd atkvæði eftir þjóðerni heldur hugsjónum. Þingmaður frá Íslandi gæti því allt eins verið í meirihluta í Brussel og hver annar fulltrúi.

Hún tók fram að hún afþakkaði afdankaða stjórnmálamenn: „Sendið okkur frjálslynda, sendið okkur konur og sendið okkur dugnaðarforka," sagði Wallis, sem sjálf er bresk og tilheyrir hreyfingu Frjálslyndra.

Máli sínu til stuðnings vitnaði varaforsetinn í gögn vefsíðunnar Votewatch.eu og taldi upp nokkur afrek þingmanna frá Möltu, Lúxemborg, Kýpur og Finnlandi.

„Það er því engin spurning að þingmenn frá smáríkjum geta haft mikil áhrif," sagði hún: Lissabon-sáttmálinn hefði hjálpað til við þetta.

Nú leita til Evrópuþingmanna, segir Wallis, Svisslendingar og Bandaríkjamenn og aðrir, til að tryggja samningum sínum við ESB fylgi. Afdrif mála ráðist oft í þinginu.

„Þessi ríki eru misvel að sér í lobbíisma. Manni finnst stundum að maður geti ekki hreyft sig í Brussel án þess að ýta við Norðmanni. Þið Íslendingar eigið margt ólært," sagði Wallis.

Wallis ræddi nýjar reglur um borgarafrumkvæði, þar sem borgarar ESB geta átt frumkvæði að löggjöf, náist að safna tilskildum undirskriftum.

Þetta væri stærra skref í átt til lýðræðis en flest aðildarrík þyrðu sjálf að stíga. klemens@frettabladid.is