Íbúar gætu verið bótaskyldir fjúki ruslatunnurnar

Íbúar Reykjavíkur sem kjósa að færa ruslatunnur sínar út að götu á sorphirðudegi eiga á hættu að verða bótaskyldir ef tunnurnar fjúka til í roki. Tryggingafélögin segja flækjustigið mikið og óttast að fjöldi slíkra mála berist.

Frá og með 1. maí verða sorphirðudagar í Reykjavík á tíu daga fresti. Þeir íbúar Reykjavíkur sem kjósa að fara með sínar tunnur út að götu, í stað þess að greiða aukasorphirðugjald,. þurfa því að fara inn á vef Reykjavíkurborgar, grafa upp þetta kort, finna sitt hverfi og fara síðan með tunnurnar út að götu á þeim dögum sem þetta litadagatal gefur til kynna.

Veðrið á Íslandi er hins vegar ekki alltaf jafn stillt og gott og það er í dag. Ruslatunnurnar geta því auðveldlega fokið til, sérstaklega þegar þær eru tómar, og rispað þá bíla sem lagt er upp við hús á þessum þrengstu götum borgarinnar. Þá vaknar að sjálfsögðu álitamál um hver eigi að bera ábyrgð á tjóninu.

Reykjavíkurborg er eigandi allra ruslatunna í borginni. Hins vegar er það íbúi húsnæðis sem kemur henni fyrir úti á götu og sorphirðumaður sem skilur hana þar eftir tóma. Í svari við fyrirspurnum fréttastofu segja helstu tryggingafélögin að þau óttist að fjölmörg slík mál berist í hvert sinn sem það hvessir. Hins vegar sé enn alveg óljóst hver beri ábyrgðina. Hvert atvik þurfi að skoða og meta sérstaklega. Þá sé mjög erfitt að meta sakarmatið enda getur ábyrgðaraðili ruslatunnu skilið hana eftir á gangstéttinni í góðu veðri og góðri trú um að það haldist óbreytt. Hins vegar þekkja flestir að veðurspánni á Íslandi er sjaldnast hægt að treysta. Flækjustigið er því mikið og ábyrgðin óljós en engu að síður kemur það vel til greina að umsjónarmaður ruslatunnunar beri ábyrgð á því tjóni sem hún veldur.