Iðnaðarráðherra falið að stytta leigutímann

Ríkisstjórnin ákvað í morgun að fela iðnaðarráðherra í samráði við fjármálaráðherra, að taka upp viðræður við HS orku, og eigendur félagsins, Magma Energy, og sveitarfélög sem landeigendur og eigendur auðlinda, um að stytta leigutíma nýtingarréttar jarðhitaauðlinda.

Þetta er í samræmi við stefnumörkun stjórnvalda. Þá leggur ríkisstjórnin áherslu á að tryggja ríkinu ótímabundinn forkaupsrétt á hlut Magma Energy Sweden í HS Orku. Jafnframt sé lögð áhersla á að samið verði um kaup opinberra aðila, og innlendra aðila, eins og lífeyrissjóða, á hlutum í HS Orku með frekari kauprétti í framtíðinni.

Þá hefur einnig verið ákveðið að ganga til samninga við Reykjanesbæ um kaup á jarðauðlindum í eigu sveitarfélagsins.

Iðnaðarráðherra ætlar að leggja fram frumvarp á vorþingi um að hámarksleigutími á nýtingarrétti vatns- og orkuauðlinda verði styttur úr þeim 65 árum sem nú er.

Samhliða þessu mun undirbúningur hefjast að mótun heildstæðrar auðlindastefnu með skilgreiningu á lykilmarkmiðum hennar og þeim almannahagsmunum sem hún á að tryggja.