Aðalmeðferð í máli níumenningana hafin að nýju

Réttarhöldin yfir níumenningunum hófust aftur nú laust eftir klukkan níu. Í gær báru sakborningar og þingverðir vitni en í dag mun rétturinn hlýða á vitnisburð lögreglumanna og þingmanna. Dómsalur 101 í héraðsdómi er þéttskipaður.

Fyrsta vitnið, lögreglumaðurinn Albert Sigurðsson, hefur lokið vitnisburði sínum. Hann vitnaði í fréttaflutning af málinu í gær og sagði framburð eins níumenninganna, Andra Leó Lemarqui ónákvæman.

Lögreglumaðurinn sagði það rangt að hann hefði hent sakborningi niður stiga. Hann hefði átt þátt í að snúa hann niður og þá hefði Andri bitið hann og væri það sérstökum Kevlar hönskum að þakka að ekki fór verr.

Spurður hvort hann teldi að Alþingi hefði verið ógnað sagðist lögreglumaðurinn ekki ætla að leggja mat á það. „Það logaði allt í slagsmálum milli lögreglu og annarra," sagði Albert.