Algjört minnisleysi í dómsal

Ákæruvaldið krefst átján mánaða fangelsis yfir tveimur síbrotamönnum, sem ákærðir eru fyrir vopnað rán. Mennirnir tilheyra svokölluðu Árnesgengi, en meðlimir þess voru ákærðir í sjötíu liðum eftir að hafa farið ránshendi um landið árið 2006. Þá er krafist sex til níu mánaða fangelsis yfir konu sem ákærð er fyrir hlutdeild í ráninu. Fólkið er ákært fyrir að færa mann nauðugan, með því að ógna honum með hnífum, á heimili hans og ræna þar tækjum og munum að verðmæti um tvær milljónir króna.

Aðalmeðferð málsins fór fram í Héraðsdómi Reykjavíkur í gær. Annar mannanna mætti fyrir dóm svo og konan. Hinn mætti ekki. Fram kom að báðir mennirnir höfðu játað sök, en konan neitað.

Algert minnisleysi sakborninga var áberandi í dómsal í gær. Maðurinn mundi atburðarásina „rosalega óljóst“. Tímabilið „var allt í þoku“. Sakborningurinn kvaðst þó muna óljóst eftir fluguhnýtingarsetti, en það var meðal muna á þýfislistanum. Þá var hann „alveg viss um að það voru engir hnífar þarna,“ og mundi alls ekki eftir hlutdeild konunnar. Hann kvaðst hins vegar hafa heyrt því fleygt að sá rændi hefði átt í ástarsambandi við konu, komið hefði upp ósætti og hún hreinsað allt út frá honum.

Konan ákærða átti við svipað minnisleysi að stríða og maðurinn fyrir dóminum. „Ég man alveg ótrúlega lítið,“ sagði hún en kvaðst þó muna að þremenningarnir ákærðu hefðu farið heim til fórnarlambsins. Spurð um ferð hennar og annars mannanna í hraðbanka, þar sem þau tóku út peninga á kort fórnarlambsins eftir hið meinta rán kvaðst hún „halda“ að hann hefði tekið út þennan pening, sjálf hefði hún ekki verið með neitt kort. Í dóminum kom hins vegar fram, að konan hafði lýst atburðarás ítarlega í skýrslutöku hjá lögreglu.

Fórnarlambið mætti í réttarsal sem vitni. Hann kvaðst hafa verið rændur, vísaði annars í lögregluskýrslur, mundi lítið eftir þýfislistanum, kvaðst ekki viss um ógnun með hníf og sagðist ekki hafa verið í sambandi við stúlku á þessum tíma.

jss@frettabladid.is