Lögfræðingur vill Pato á bak við lás og slá

Brasilíski fótboltamaðurinn Pato, sem hefur leikið með AC Milan á Ítalíu undanfarin misseri, stendur í ströngu utan vallar. Lögfræðingur fyrrum eiginkonu hans hefur nú farið fram á að Pato verði dæmdur í fangelsi.

Framherjinn og brasilíska leikkonan Sthefany Brito giftu sig árið 2009 en það hjónaband stóð ekki lengi yfir. Brito fór fram á skilnað þar sem hún var búinn að fá nóg af villtum veislum hjá eiginmanninum.  Núna þegar parið hefur verið skilið í eitt ár hefur Pato tekið saman við dóttur forseta AC Milan, Silvio Berlusconi en hún heitir Barbara.

Gisela Pazini, sem er lögfræðingur fyrrum eiginkonu Pato, segir að allt verði gert til þess að leikmaðurinn verði dæmdur fyrir brot á því samkomulagi sem gert var við skilnaðinn.  Pazini heldur því fram að Pato hafi ekki greitt eina einustu krónu til Brito en hann rekur málið fyrir dómstólum í Brasilíu.

„Við munum gera allt sem í okkar valdi stendur til þess að Pato verði dæmdur í fangelsi fyrir brot sitt,“ segir Pazini. Lögfræðingur Pato er að sjálfsögðu á annarri skoðun og segir leikmanninn hafa greitt fyrrum eiginkonu sinni um 700.000 kr. á mánuði frá því að þau skildu.

.