Ungmenni játuðu innbrot í Reykjavík

Lögreglan á höfuðborgarsvæðinu hefur upplýst tvö innbrot sem voru framin í Reykjavík í nótt. Við sögu komu fjögur ungmenni á aldrinum 17 til 19 ára og voru tvö þeirra vistuð í fangageymslu fram eftir degi. Hinum stolnu munum hefur verið komið aftur í réttar hendur, segir í tilkynningu frá lögreglunni á höfuðborgarsvæðinu.

Þá hefur lögreglan á höfuðborgarsvæðinu einnig haldlagt þýfi úr tveimur innbrogum í Hafnarfirði fyrr í mánuðinum. Um er að ræða töluvert magn af bæði byggingarefni og verkfærum er unnið að því að koma hinum stolnu munum aftur í réttar hendur.

Rannsókn málsins er ekki lokið en þess má geta að þýfið fannst í bíl sem hafði verið stolið, segir í tilkynningu frá lögreglunni.