Nota hafnsögubát við slökkvistarfið

„Við erum komnir með hafnsögubát með stórar og miklar dælur sem er að sprauta á eldinn. Við erum líka að sprauta frá landi," segir slökkviliðsmaður við bryggjuna í Gufunesi í samtali við Vísi.

Eldur kviknaði í bryggjunni á sjöunda tímanum í kvöld og leikur grunur á að kviknað hafi í útfrá rafmagni. Á tímabili var eldurinn töluverður en slökkviliðinu hefur gengið bærilega að slá á hann.

Slökkviliðið telur líklegt að íbúar í Grafarvogi og víðar geti fundið fyrir óþægindum vegna reyks. Samkvæmt upplýsingum Vísis hefur reykjalykt fundist allt upp í Mosfellsbæ.