Endurreisnin á forsendum kröfuhafa en ekki fólksins

Lilja Mósesdóttir, óháður þingmaður, segir að „hin svokallaða norræna velferðarstjórn“ hreykti sér af dugnaði við „hreingerningar eftir efnahagshrunið“. Þetta sagði hún í umræðum um stefnuræðu forsætisráðherra í kvöld. Hún sagði að stjórnin hreykti sér meðal annars af því að hafa afstýrt greiðsluþroti ríkissjóðs. „Slíkar fullyrðngar sýna að lítið hefur breyst eftir hrun. Gagnrýni á stefnu stjórnvalda er svarað með upphrópunum og útúrsnúning,“ sagði Lilja.

Hún sagði að byrðum fjármálakreppunnar hefði verið komið á herðar þeirra sem veikastir voru fyrir. Þúsundir væru atvinnulausar og aðrar þúsundir eignalausar eftir verðtrygginguna og skuldaúrlausnir sem gengu ekki upp. Bankakerfið hefði verið endurreist á forsendum kröfuhafa en ekki fólksins í landinu. Aðgerðir ríkisstjórnarinnar hafi aukið á misskiptingu í samfélaginu og dregið úr efnahagslegri velferð.

Lilja sagði að ríkisstjórnin væri rúin trausti almennings og ekkert ætti að gera til að breyta því. „Það er kominn tími á uppstokkun,“ sagði Lilja.