Læknaskortur tækifæri til að endurhanna heilbrigðisþjónustu

Forseti læknadeildar Háskóla Íslands segir læknaskort á Íslandi mögulega vera tækifæri til að endurhanna heilbrigðisþjónustuna frá grunni. Hann segir lausnina ekki vera að útskrifa fleiri lækna.

Í fréttum stöðvar tvö í gærkvöldi var fjallað um læknaskort á Íslandi. Þar kom meðal annars fram að þriðjungur þeirra sem hafa íslenskt læknaleyfi starfi nú erlendis og að um 100 læknar hafi flust frá landinu á síðustu tveimur árum. Sigurður Guðmundsson fyrrverandi landlæknir og forseti læknadeildar Háskóla Íslands segir eina hugmynd um lausn á þessu vandamáli sé að útskrifa fleiri lækna.

„En ég held nú samt einhvern veginn að við ættum að hugsa okkur tvisvar um áður en við förum að mennta fleiri lækna til útflutnings held við ættum frekar að horfa á vandann heima og breyta til og gera læknum auðveldar og fýsilegra að koma hérna heim og vinna hérna,“ segir Sigurður.

Hann segir hins vegar að ef læknaskortur verður viðvarandi þurfi mögulega að breyta upbbyggingu heilbrigðisþjónustunnar frá grunni.

„Að tefla meira fram öðrum stéttum en læknum í ýmisskonar verk sem núna eru fyrst og fremst á höndum lækna, til dæmis hjúkrunarfræðinga og fleiri, þetta er alþekkt í öðrum löndum, hjúkrunarfræðingar eru mun öflugari til dæmis í heilsugæslu heldur en hér og ýmis störf inn á sjúkrahúsunum eru í höndum hjúkrunarfræðingar sem er síður hér, þetta er eitthvað sem þarf að hugsa og beinir spjótunum ekkert síður að okkur sem sjáum um menntun heilbrigðisstétta,“ segir Sigurður.

Hann segir tækifærið einmitt vera núna til að gera svona breytingar.

„Neyðin kennir naktri konu að spinna og allar breytingar eru nauðsynlegar öðru hvoru og þær koma oft upp úr svona kreppum eða erfiðum kringumstæðum.“