Van Marwijk brjálaður út í FC Bayern

Bert van Marwijk, landsliðsþjálfari Hollands, er afar ósáttur við framkomu forráðamanna þýska stórliðsins FC Bayern vegna meiðsla Arjen Robben. Hann vill að hætt verði við fyrirhugaðan vináttuleik hollenska landsliðsins við Bayern í maí næstkomandi.

Þetta er ekki í fyrsta sinn sem van Marwijk lýsir yfir óánægju sinni með Bayern en þýska félagið er mjög óánægt með hvernig farið var með Arjen Robben á HM í Suður-Afríku í fyrra.

Robben meiddist skömmu fyrir mótið en spilaði engu að síður í síðustu leikjum Hollands í keppninni. Meiðsli hans urðu verri og missti Robben því af stórum hluta keppnistímabilsins með FC Bayern í fyrra.

Nú hefur Robben verið frá síðustu fimm vikurnar vegna meiðsla en var engu að síður valinn í landslið Hollands fyrir leiki liðsins gegn Moldóvu og Svíþjóð. Robben varð þó að draga sig úr hópnum vegna meiðsla á ný og gekkst hann í vikunni undir aðgerð á mjöðm.

Forráðamenn Bayern fullyrtu að Robben meiddist við æfingar með hollenska landsliðinu í upphafi vikunnar. Því hafnaði van Marwijk alfarið og það sé læknum landsliðsins að þakka að hann hlotið enn verri meiðsli en raunin varð.

„Hann tók aðeins þátt í tveimur léttum skokkæfingum með okkur áður en ákveðið var að senda hann til sérfræðings þar sem læknar okkar grunuðu að hann væri með kviðslit.“

„Og nú eru þeir að reyna að klína þessum meiðslum á okkur í stað þess að þakka fyrir þá góðu meðhöndlun sem hann fékk hjá okkur,“ sagði van Marwijk.

Hollenska knattspyrnusambandið komst að samkomulagi við Bayern um að liðin myndu spila vináttuleik þann 22. maí næstkomandi sem sárabót fyrir meiðslin sem Robben varð fyrir í aðdraganda HM 2010.

„Ef þetta væri undir mér komið myndi ég blása þennan leik af,“ sagið van Marwijk. „Ég er búinn að fá algerlega nóg af Bayern.“

Forráðamenn hollenska sambandsins hafa þó ítrekað að samkomulagið verði virt og að leikurinn muni fara fram eins og áætlað var.