Uppfyllir allar evrópskar kröfur

Jón Jónsson, flugáhugamaður og bifvélavirki, segir í grein í Fréttablaðinu í gær að Dash-8, flugvél Flugfélags Íslands, sé „fljúgandi dauðagildra“. Vélin sem brotlenti í Grænlandi í byrjun mars var af gerðinni Dash-8 og bendir Jón á það í grein sinni. Hann segir öryggisatriðum í vélum af þessari gerð verulega ábótavant og hefur sent Flugmálastjórn Íslands bréf í tvígang þar sem hann bendir meðal annars á að neyðarútgangar séu við þau svæði sem algengast er að kvikni í við brotlendingu. Svör frá Flugmálastjórn eru þau að vélin uppfylli evrópska staðla.

„Það er notalegt til þess að vita að maður getur þá fullkomlega löglega brunnið til bana inni í Dash-8,“ segir Jón í grein sinni. Árni Gunnarsson, framkvæmdastjóri Flugfélags Íslands, tekur í sama streng og Flugmálastjórn og segir þá einu Dash-8 vél fyrirtækisins áfram verða notaða.

„Flugmálastjórn er okkar eftirlitsaðili og við heyrum undir evrópsku eftirlitsstofnunina. Þessi vél er samþykkt samkvæmt öllum evrópskum stöðlum,“ segir Árni. „Þessi vél er mjög víða notuð í Evrópu, þannig að ég gef ekki annað út vegna þessarar greinar.“

Dash-8 vél Flugfélagsins flýgur bæði til Grænlands og í innanlandsflugi hér á landi. - sv