Komið að þolmörkum leikskólakennara

„Allir hafa sín þolmörk og nú er komið að þeim hjá leikskólakennurum," segir Marta Dögg Sigurðardóttir, formaður Félags leikskólakennara. Hún segir vinnu í starfshópum sáttasemjara ganga hægar en vonir stóðu til og forsendur kjarasamningagerðar því enn óljósar. Beðið er eftir því hvaða stefnu samningamálin á almennum vinnumarkaði taki en þar er allt í hnút, meðal annars vegna deilu Samtaka atvinnulífsins og ríkisstjórnarinnar um framtíð kvótakerfisins.

Stjórnir fyrstu svæðadeildar Félags leikskólakennara og Félags stjórnenda á leikskólum stóðu í gærkvöldi fyrir opnum félagsfundi um stöðuna í kjaramálum félaganna og áhrif niðurskurðar til leikskólamála hjá Reykjavíkurborg. Fundargestir voru um 300. „Það var setið á hverjum stól og á hverri gluggakistu," segir Marta.

Á fundinn boðuðu stjórnir félaganna fulltrúa borgarstjórnarflokkanna í Menntaráði, en þau Oddný Sturludóttir, formaður Menntaráðs og fulltrúi Samfylkingar, Óttar Proppé, fulltrúi Besta flokksins, og Þorbjörg Helga Vigfúsdóttir, fulltrúi Sjálfstæðisflokks og fyrrum formaður Leikskólaráðs þáðu boðið.

Enginn fer í verkfall að gamni sínu



Marta Dögg hóf fundinn og gerði félagsmönnum grein fyrir stöðunni í kjarasamningavinnunni.

Hún segir leikskólakennara upp til hópa vera jákvæða og sveigjanlega fagstétt sem væri tilbúin að leggja töluvert á sig og láta ýmislegt yfir sig ganga til að verja hagsmuni nemenda sinna. Allir hafi hins vegar sín þolmörk og margt benti til að nú væri komið að þeim hjá leikskólakennurum. Félagið myndi á næstu dögum leita ráða hjá lögmanni varðandi mögulegar aðgerðir til að þrýsta á viðsemjendur ef á þyrfti að halda. Hún sagðist hins vegar vona í lengstu lög að til slíkra aðgerða þyrfti ekki að koma.

Marta ítrekaði að það færi enginn í verkfall að gamni sínu og síst að öllu við þær aðstæður sem nú ríkja. Verkföll væru neyðarúrræði launamanna sem ekki fengju úrlausn mála sinna með hefðbundnum hætti.

Marta sagðist binda vonir við að í sameiningu tækist aðilum að verja leikskólana í kreppunni. Það væru sameiginlegir hagsmunir félagsmanna, sveitarstjórnarmanna og fjölskyldnanna í landinu.

Óskar eftir heiðarleika



Marta Dögg lauk fundinum með ákalli til ráðamanna í borginni. Hún kallaði eftir því að ráðamenn væru heiðarlegir og segðu hlutina eins og þeir eru. Það væri óvirðing við leikskólakennara og nemendur að halda því fram að sameiningar leikskóla og samrekstur skólastiga væri faglega betri kostur fyrir börnin í borginni. Það væri heiðarlegra að segja bara eins og er að við höfum ekki efni á að reka skólana með óbreyttum hætti. Þá væri líklegra að hægt væri til baka því sem skorið hefur verið niður þegar kreppunni lýkur.